Gwirfoddoli

Fel rhan o’i rôl monitro, mae Awdurdod yr Heddlu yn gweithredu dau Gynllun Ymwelwyr Lleyg:

Cynllun Ymwelwyr Annibynnol â'r Ddalfa

Mae Ymweliadau Annibynnol â’r Ddalfa yn gynllun lle mae aelodau o’r cyhoedd, sy’n cael eu penodi a’u hyfforddi gan Awdurdod yr Heddlu, yn ymweld â gorsafoedd yr heddlu yn ddirybudd i edrych ar les pobl a gedwir yng ngorsafoedd yr heddlu. Mae’r cynllun yn gwbl annibynnol ar yr heddlu ac yn helpu i wella atebolrwydd a hyder y cyhoedd mewn plismona.

Ni roddir rhybudd o’r ymweliadau a’r nod yw ymweld â phob gorsaf dalfa yn ardal Dyfed Powys o leiaf unwaith y mis.

Daeth Ymweliadau Annibynnol â’r Ddalfa yn gyfrifoldeb statudol i awdurdodau’r heddlu ar 1af Ebrill 2003 dan Adran 51 Deddf Diwygio’r Heddlu 2002. Drwy wneud ymweliadau annibynnol â’r ddalfa yn statudol, codwyd statws yr ymweliadau ar unwaith ac mae cod ymarfer ategol wedi sicrhau safonau cyson ar draws Cymru a Lloegr.

Mae Awdurdod Heddlu Dyfed-Powys yn gweinyddu cynllun Ymwelwyr Annibynnol â’r Ddalfa, ac ar hyn o bryd, mae ganddynt lefydd gwag yn Llanelli (Sir Gaerfyrddin), Aberystwyth (Ceredigion), Hwlffordd (Sir Benfro), Llandrindod Wells a Drenewydd (Powys).

Ffurlen Gais, gweler:  Dod yn Ymwelydd Annibynnol â’r Ddalfa

Cynllun Ymwelwyr Lleyg er Lles Anifeiliaid

Yn sgil marwolaeth un o gŵn yr heddlu tra roedd yn cael ei hyfforddi ac erlyn swyddogion yr heddlu o ganlyniad, collodd y cyhoedd hyder mewn dulliau hyfforddi cŵn yr heddlu. O ganlyniad, cynhaliwyd adolygiad a lansiwyd Strategaeth Cŵn yr Heddlu gan Gymdeithas Prif Swyddogion yr Heddlu.

Nod y strategaeth hon oedd adfer hyder y cyhoedd a sicrhau y rhoddir blaenoriaeth uchel i les cŵn yr  heddlu a’u bod yn cael eu trin yn effeithiol, yn hynaws ac yn foesegol mewn modd agored.

Er mwyn ymateb i’r Strategaeth hon, mae Awdurdod Heddlu Dyfed Powys wedi sefydlu Cynllun Ymwelwyr Lleyg er Lles Anifeiliaid. Lluniwyd rota o ymweliadau i sicrhau bod pob swyddog trin cŵn yn cael ymweliad gan Ymwelydd Lleyg Annibynnol er Lles Anifeiliaid o leiaf unwaith y flwyddyn.

Amcanion y Cynllun

• Galluogi aelodau penodedig o’r gymuned leol, ynghyd â gweithwyr proffesiynol o sefydliadau lles anifeiliaid e.e. RSPCA, Cynghrair Genedlaethol Amddiffyn Cŵn, Arolygwyr Iechyd Anifeiliaid o Awdurdodau Unedol ac ati, i edrych ar amodau byw cŵn yr heddlu, sut y cânt eu hyfforddi a’u cludo a’u hamodau gwaith, a chyflwyno adroddiadau ar hynny.
• Darparu dull o gynnal gwiriad annibynnol o’r ffordd y mae swyddogion trin cŵn gi yn ymgymryd â’u cyfrifoldebau mewn perthynas â’r anifeiliaid sydd dan eu gofal.
• Sicrhau bod cynnwys llawlyfr Cyffredinol Hyfforddiant a Gofal ar gyfer Cŵn yr Heddlu ar gael i’r cyhoedd.
• Sicrhau bod cofnodion manwl o hanes meddygol y cŵn ar gael i Ymwelwyr Lleyg eu harchwilio.

Cynllun Ymwelwyr Lleyg er Lles Anifeiliaid (PDF, 133 kB)

Grŵp Ymgynghorol Annibynnol
                           
Mae Grŵp Ymgynghorol Annibynnol yn cyflawni rôl bwysig cyfaill beirniadol ar gyfer yr Heddlu ac Awdurdod yr Heddlu.  Fforwm ydyw lle mae ymgynghorwyr annibynnol yn rhoi cyngor annibynnol ynghylch materion arbenigol a godir gan yr heddlu ac awdurdod yr heddlu.   Gall y materion hyn gynnwys  polisïau, dulliau gweithredu, arferion, neu ddigwyddiadau argyfyngus - yn syml, unrhyw beth sydd yn effeithio neu a allai effeithio ar y cymunedau yn yr ardal blismona.

Nid yw craffu yn un o rolau’r Grŵp Ymgynghorol Annibynnol, yn hytrach mae yno i warchod pob un o’n cymunedau rhag dioddef anfantais yn sgil diffyg dealltwriaeth, neu anwybodaeth neu gred gamsyniol.

Mae’r Grŵp Ymgynghorol Annibynnol yn fforwm delfrydol i gynrychiolwyr o’r Heddlu a’r Awdurdod gymryd rhan mewn deialog agored gydag unigolion, a chlywed ystod o farnau amrywiol, sy’n rhoi darlun bras o safbwyntiau’r gymuned mewn perthynas â pholisïau, gweithdrefnau neu arferion.

Mae’r Grŵp Ymgynghorol Annibynnol yn cynrychioli yn fras y cymunedau amrywiol a wasanaethir gennym o ran oed, rhyw, ailbennu rhywedd, anabledd, hil, crefydd neu gred, cyfeiriadedd rhywiol a’r iaith Gymraeg.  

Mae’r broses recriwtio ar gyfer y Grŵp Ymgynghorol Annibynnol yn un teg a thryloyw. Gofynnir i’r ymgeiswyr gymryd rhan mewn trafodaeth grŵp er mwyn asesu eu haddasrwydd ar gyfer y rôl. Caiff pob ymgeisydd ei fetio hyd at Fetio Personél sydd heb fod yn Heddlu (NPPV) Lefel 2, yn unol â Pholisi Fetio Cenedlaethol ACPO. 

Bydd y Grŵp Ymgynghorol Annibynnol yn cyfarfod tair gwaith y flwyddyn ac yn gweithio o fewn cynllun cytunedig, gyda blaenoriaethau’n cael eu gosod gan Heddlu ac Awdurdod Heddlu Dyfed-Powys. I weld Cylch Gorchwyl y Grŵp Ymgynghorol Annibynnol, cliciwch yma. Am becyn cais, cliciwch yma. 

Cynhaliwyd cyfarfod cyntaf Grŵp Ymgynghorol Annibynnol Heddlu ac Awdurdod Heddlu Dyfed-Powys ym mis Medi 2011. I weld nodiadau’r cyfarfod hwnnw, cliciwch yma (PDF, 146KB). 

Cynhaliwyd yr ail gyfarfod ym mis Ionawr 2012. I weld nodiadau’r cyfarfod, cliciwch yma (PDF, 193KB).

Rhagor o Wybodaeth

Os hoffech gael rhagor o wybodaeth am y Cynlluniau, cysylltwch â:

Cydlynydd y Cynllun ar 01267 226440
e-bost: police.authority@dyfed-powys.pnn.police.uk

Adroddiad Blynyddol Ymweliadau Annibynnol a Dalfeydd â Lles Anifeiliaid

Mae wedi bod yn flwyddyn lwyddiannus arall o ran gweithredu’r cynllun ymweliadau dalfeydd. Croesawyd ymwelwyr newydd i’r cynllun, a mawr obeithiwn y byddant yn gwasanaethu am nifer o flynyddoedd i ddod. Mae’r Awdurdod yn adolygu ei brosesau yn barhaus er mwyn gwella effeithiolrwydd y cynllun ymweliadau dalfeydd, ac er mwyn cynyddu’r cymorth a roddir i’w dîm gwerthfawr o wirfoddolwyr.