Gwahoddiad i Chi Ddod i Siarad â Ni Gan Awdurdod Heddlu Dyfed-Powys

Bydd Awdurdod Heddlu Dyfed-Powys yn cynnal y cylch nesaf o Gyfarfodydd Ymgynghorol Cymunedol yn y man.

Bydd Heddweision ac Aelodau o Awdurdod yr Heddlu yn dod i’r cyfarfodydd hyn fydd yn cael eu cynnal ar draws ardal yr Heddlu yn ddiweddarach y mis hwn. Rydym yn annog aelodau’r cyhoedd i ddod i leisio’ch pryderon a holi cwestiynau fel ein bod ni yn gallu sicrhau y darperir y gwasanaeth plismona gorau posib ar eich cyfer.

Mae’r cyfarfodydd hyn yn dilyn ymlaen o’r cyfarfodydd a gynhaliwyd ym mis Tachwedd a mis Rhagfyr y llynedd. Maent yn gyfle i drigolion lleol a’n partneriaid glywed sut y mae’r heddlu yn y rhanbarth wedi perfformio yn erbyn y blaenoriaethau a bennwyd gan Awdurdod yr Heddlu ar gyfer 2009/10 yn dilyn ymarferion ymgynghori â’r cyhoedd. Bydd y cyfarfodydd hefyd yn gyfle i ni roi’r wybodaeth ddiweddaraf i chi am y blaenoriaethau a bennwyd ar gyfer y flwyddyn ariannol nesaf a hefyd i gadarnhau’r gyllideb a’r praesept ar gyfer 2010/11, a gytunir yng nghyfarfod llawn nesaf yr Awdurdod ar y 15fed o Chwefror 2010. Yn olaf, cynhelir sesiwn holi ac ateb pan gewch gyfle i drafod eich pryderon gydag Awdurdod yr Heddlu.

Meddai Delyth Humfryes, Cadeirydd Awdurdod yr Heddlu:

“Awdurdod yr Heddlu yw’r corff sy’n dal yr Heddlu’n atebol ar ran ein cymunedau. Rhaid i ni sicrhau bod gennych wasanaeth heddlu effeithiol ac effeithlon sy’n ateb eich anghenion.

“I’n galluogi i gynrychioli ein cymunedau mae angen i ni glywed eich barn chi. Rydym wedi trefnu cyfarfodydd ymhob rhanbarth yr Heddlu ac anogir pobl i ddod iddynt er mwyn rhoi eu barn ar sut y dylai Heddlu Dyfed-Powys weithredu yn y dyfodol.”

Bydd pob cyfarfod yn cychwyn am 7pm ac mae’r manylion fel a ganlyn:

Dydd Mercher, 17eg Chwefror – Ystafell Gynhadledd Awdurdod yr Heddlu, Llangynnwr, Caerfyrddin, SA31 2PF
Dydd Iau, 18fed Chwefror – Canolfan Adnoddau’r Cyfryngau, Ystafell 1, Oxford Road, Llandrindod, Powys, LD1 6AH
Dydd Mawrth, 23ain Chwefror - Cyngor Sir Penfro, Neuadd y Sir, Hwlffordd, Sir Benfro, SA61 1TP
Dydd Iau, 25ain Chwefror – Ystafelloedd y Cyngor, Penmorfa, Aberaeron, Ceredigion,
SA46 0PA

Os hoffech gael unrhyw wybodaeth o gwbl am y cyfarfodydd, cysylltwch ag Awdurdod yr Heddlu ar 01267 226440 neu e-bostiwch police.authority@dyfed-powys.pnn.police.uk